Кто Тебе по достоянию ублажити может, Пресвятая Дево; кая уста воспети Твое величие, всяк смысл превосходящее возмогут; Вся преславная о Тебе содеянная таинства, Богородице, выше смысла и слова суть. Красоте Девства Твоего и пресветлей чистоте Твоей удивишася Херувими и ужасошася Серафими: чудесе же рождества Твоего нетленнаго ни человеческий, ни ангельский язык изрещй может. От Тебе бо безлетный единородный Сын Божий, Бог Слово, неизреченно воплощься, родйся и с человеки поживе, и Тя, яко Матерь Свою, зело возвелйчи, Царицу Тя всея твари показа, нам же известное спасения пристанище. Темже вси под кров Твой притекающий, различными скорбями и болезньми одержимии, богатное утешение и исцеление приемлют и Тобою от бед спасаются: Ты бо воистину Мати всех скорбящих и обремененных, печальных радость, больных целительница, юных хранительница, старости жезл, праведных похвала, грешных спасения надежда и к покаянию путеводительница: всем бо всегда предстательством Твоим помогавши, и всех с верою и любовию к Тебе прибегающих заступаеши.Ты и мне помози, отчаянному деяний моих ради. Заступнице усердная рода христианскаго, заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота: не остави убо мене и не презри мя, но ими же Сама веси судьбами, спаси мя, яко благословенна есй во веки веков. Аминь.
